Эркин курашнинг афсонавий вакили. Уч марта олимпиада чемпиони, олимпиада вице-чемпиони. Жаҳон чемпионатларида шоҳсупага беш маротаба кўтарилган, шундан икки мартасида олтин медаль билан тақдирланган. Икки марта Осиё чемпиони, Осиё ўйинларининг уч карра чемпиони.

1979 йил 20 июлда туғилган.

2000 йили Австралиянинг Сидней шаҳрида ўтказилган олимпия ўйинларида -130 кг вазн тоифасида гиламга чиққан. Венгриялик Гомбош, туркиялик Ойдин Пўлатчи, чорак финалда АҚШ термаси аъзоси К.Маккой, ярим финалда кубалик А.Родригес каби кучли рақибларни енгиб финалга чиққан. Россия терма жамоаси аъзоси Давид Мусульбес билан беллашувда ҳисобда олдинда борганига қарамай, тажриба етишмагани оқибатида мағлубиятга учраган ва кумуш медаль билан тақдирланган.

2004 йили Афинадаги олимпиадада -120 кг вазн тоифасида курашган. Дастлаб ҳиндистонлик Чема Сингҳ, польшалик Гармулевич устидан яққол устунлик билан ғалаба қозонган. Чорак финалда жаҳон ва Европа чемпионатларида бир неча бор зафар қучган россиялик Курамагомед Курамагомедов, ярим финалда эса туркиялик Ойдин Пўлатчини таслим қилган. Финалда эронлик Алиризо Ризоийни мағлубиятга учратиб, олимпиада чемпиони унвонига сазовор бўлган.

2008 йили Пекинда ўтган олимпиадада дастлаб озарбайжонлик Али Исаевни мағлуб этган. Чорак финалда кубалик Дисней Родригесга имкон қолдирмаган. Ярим финалда Сиднейдаги мағлубият аламини олиб, Давид Мусульбесни енгган. Финалда россия термаси аъзоси Бахтиёр Аҳмедовни тор-мор келтирган Артур Таймазов икки карра олимпиада чемпионига айланган.

2012 йили Лондондаги олимпиадада ўзбекистонлик полвон зафарли анъанани давом эттирди. Дастлаб Германия термаси аъзоси Ник Матюхин мағлуб этилди. Чорак финалда эронлик Комил Ҳошимийдан устун келди. Ярим финалда америкалик Тервел Длагневни доғда қолдирди. Финалда грузин полвони Давид Модзманашвили спортчимизнинг кучини тан олишга мажбур бўлди. Шу тариқа Артур Таймазов номи эркин кураш бўйича олимпиадаларнинг уч карра чемпионига айланган учинчи спортчи сифатида тарих саҳифаларига зарҳал ҳарфлар билан битилди.

Ўз навбатида, Артур Таймазовнинг Ўзбекистон шарафини кўплаб халқаро мусобақаларда муносиб ҳимоя қилгани таҳсинга лойиқ. “Эл-юрт ҳурмати” ордени, “Ўзбекистон Республикасида хизмат кўрсатган спортчи”, “Ўзбекистон ифтихори” фахрий унвонлари билан мукофотланган.